ភ្នំពេញ៖ រដ្ឋបាលរាជធានីភ្នំពេញសម្រេចដាក់ឱ្យដំណើរការជាបណ្តោះអាសន្នសាឡាងចម្លងកោះពេជ្រ-កោះនរា ឆ្លងកាត់ទន្លេបាសាក់ក្នុងពំ្រប្រទល់ខណ្ឌចំការមន និងខណ្ឌច្បារអំពៅ រាជធានីភ្នំពេញ ដើម្បីបញ្ជៀសការកកស្ទះនៅស្ពានច្បារអំពៅ។

ក្នុងសេចក្តីជូនដំណឹងចុះថ្ងៃទី១៨ ខែកុម្ភៈ រដ្ឋបាលរាជធានីភ្នំពេញបានឱ្យដឹងថា ការដាក់ដំណើរការនេះដើម្បីជួយសម្រួលដល់ការធ្វើដំណើររបស់ប្រជាពលរដ្ឋឆ្លងកាត់ស្ពានព្រះមុនីវង្ស ដែលតែងតែជួបប្រទះនូវការកកស្ទះចរាចរជាញឹកញាប់ និងដោយសារតែស្ពានកោះពេជ្រ-កោះនរាកំពុងតែដំណើរការសាងសង់។

រដ្ឋបាលរាជធានីភ្នំពេញបានបញ្ជាក់ថា ក្រុមហ៊ុនជលយានចម្លងអរិយក្សត្រ អាន សំអន ឯ.ក ជាអ្នកធ្វើអាជីវកម្មសាឡាងចម្លងអ្នកដំណើរ រួមទាំងមធ្យោបាយយានយន្តគ្រប់ប្រភេទឆ្លងកាត់ទន្លេបាសាក់ជាបណ្ដោះអាសន្ន ចាប់ពីថ្ងៃទី២១ ខែកុម្ភៈ ឆ្នាំ២០២២ តទៅដោយចាប់ផ្តើមពីម៉ោង៦ព្រឹក ដល់ម៉ោង១៩យប់ ជារៀងរាល់ថ្ងៃ។

អាស្រ័យដូចនេះប្រជាពលរដ្ឋអាចធ្វើដំណើរតាមសាឡាងចម្លងនេះ ដើម្បីកាត់បន្ថយការកកស្ទះចរាចរនៅលើដងស្ពានព្រះមុនីវង្ស៕